Pulpit Khellam Khristian
(Christianity Beyond the Pulpit)
By: Kh Sang Vaiphei
Nikhat Thugentu khat hi a chapa’n, “Hepa, hun zosia hi pulpit chung ah la umsek gual kha hileh ka nuam ngei, zia hun a khan, la maisua le a tai a, hepina in la dim a, mipite chung ah khawtuana’n la dim a, phatna bukim nei gual in ka hun mu sek in katha a muang sek ma ma hi. Ahinla, tuhin la maisua danglam in ka muta, la thugen lai maisua tai tak leh mipite khawtuanate kha X gual in a kimai ngattua umtalo gual in ka mu ziang ta bang ti a hi tam?” tin a dawng hi. A Pa’n, (nuaisia tak kawm in) “zia chuh nang ei gen leh genlo a khawk ah ahem? A la kium thek tan lah, nang lungkham na ding bangma a um puai.” Ti’n a vak dawnhu hi. A chapa’n a dawnhu kit na chun, “Hepa, ka lung a buai hi, pulpit chung ah la thugente kha ka zui ding ahem ahiloleh pulpit chung lo ate,” ti in a dawng hi.
Zia a chung ah chanchin hin thil tamtak ei zilsak hi. (1) Thugentu’n pulpit chung ah a thugen tawh pulpit khellam ah a umchante a kibatlo dan, a chapa’n a gendaw piak hi. (2) Thugentu chun pulpit chung ah a thugente chu bangma’n a ngaisak puai ti hetthei ahi. (3) Thugentu chun pulpit khellam thilte a ngaitua phaklo dan hetthei ahi. (4) Thugentu chun a chapa thugen chu a thulak puai ti hetdaw thei ahi. (5) Mi khenkhat â ding in pulpit khellam thil bangma a um ngai puai.
A tangpi’n pulpit chung ah nasep hi pani ah khen ahi: (1) Preaching (Pathian thugen=pianthakna ding ah) leh (2) Teaching (Pathian thu’h Khanna ding ah kithuhilna).
(1). Preaching (Pathian thugen=Pianthakna ding ah): Zia hi a diak ah ginglotute â ding ah/piangthak nailote â ding ah gen ahi sek hi.
(2). Teaching (Pathian thu’h Khanna ding ah kithuhilna): Zia hi a diak ah gingtute â ding/piangthak sate â ding ahi. Taksa leh thagaulam ah khanto theina ding ah kithuhilna ahi. Ahinla, ei gingtute lak ah panina hi zui ahi deu hi.
A chung ah point nite hi, pulpit chung ah thilbawl/nasep tangpi ahiu a, a paniu in malam thil ah hiding/bawl ding a gen gel gel ui. A chung ah point panite hi huap khalo ah pulpit chunga thugen chu a kawk (focus) bei ahi. Pulpit chung ah thu kigen hi alek/atawp ahi pua, a kipatna bep ahi. Piangthaklote piangthakna ding, taksa leh thagaulam ah hatlote hatna ding, zia kipat chu pulpit khellam ah nasep theina ding ah kiziltilna ahi zaw’i. Pulpit chung hi thagaumi hina latsakna ding ahi khel pua, thagaumi hina kilatna tak tak chu pulpit khellam ahi.
Kumzabi khatna hunlai ah nungzuite/gingtute kha pawlam mite et in Jesu Khrista nungzui ahinau kha mu ah hetziang thei ala hi. Jesu Khrista nungzui ahinau kha mu ah hetziang thei ahi ziak ua khan, musitna leh nuizat bawlna ah Khristian ti min ala sak uh ahi. Pawlam mite’n musitna ziak leh nuizat bawlna ah a mat uh hiziang maleh, a Khristian hinau kha pawlam ah muthei ahi ziak ala hi. Pulpit chung ah Khristian hina nasatak ah genlat/suklat hi pawlam mite â ding ah umzia bei ahi, muphaklo ahi ziak un. Baibul in, “la vâk uh chu mite mit mu in vâk ta hen” a ti ziak in (Mat. 5:16), pulpit chung ah vâk chu, thaumei law nuai ah kikawi gual ahi, pawlam mite’n mutheilo ahiziak un. Pulpit chung bep ah thagaumi a kitam tak ziak in, pawlam mite’n nêkding a mudawk zo ta puau.
Simtu zosia Lalpa’n, Pulpit khellam khristian hithei ding in ei maljawl ta hen.
