LUNGMON UM PUITU
Proverbs 3:3,4
“3 Tahsan naumna le nakitahna chu lhaso hihhel in, hiche te ni chu khivui-on ki-on lang, abonchan nalungthima
nalung changa chun Lekhajem kijih lut bangin jih lut’in. 4 Chutileh Pathen le mihem mu ding a lunglhai nauma
minpha namu ding ahi.”
Tuni a chomcha Pathen thu a kon ingaito khom diu va ka dei chu ahileh, nangle kei tahsa lam lhagao lam a puihoi tu (MENTOR) khat ihi naova hi, thilni isuh mil lou diu ka nom in ahi.
1. Pathen toh eima kah kiguijop na chintup angai e.
2. Chuleh I Mentee toh kiguijop na chintup angai e.
Mentor khat kitihi thilneo cha ahipoi, lamhil khat puihoi tu khat hidia Pathen in eikou ahi, einganse ahi tihi kihet
chen a chuleh kiphal angai in ahi. Hijeh a chu eima ho puihoi tu khat idinmun iki vet chen angai in ahi.
- Pathen mitvet leh mihem ho mitvet adia Tahsan thei a hinkho Kaman hinam?
- Pathen leh mihem masang a kitahna hinkho hi kaman jing hinam?
Tahsan na leh Kitahna hinkho toh ikijop mat jing uleh, Pathen leh mihem mitvet a lunglhai ium uva gapha iso doh jing diu hiche achu minphat najong kichang ding ahi ti imu thei un ahi.
Chuleh I Pakai Jesu Christa a kona puihoi tu pha hithei na ijil diu phabep ana veu hite:-
1. Lhagao theng thahat nan a akingai jin ahi;
– I Pakai Jesu tahsa mihem thina kon athodoh jouva nangle kei a dia tonsot mun sem dia akal masang koncha chun aseijui te kom ah thupeh manlu tah ana pen ahi. Hichun aman “Nanghon Jerusalem dalha hih’un; Pa thutep keiya kona najah u chu ngah jing un….. nang hovang tukal ni phabep joule Lhagao theng a baptize nachan dingu ahi,” ati. Hitichun ni somnga jou chun aman athu tep bang chun Lhagao theng ahung kum lhan seijui Peter chun Lhagao thahat na chang in kipana thupha aphon doh lai chun, Pathenin na kidang tah atoh a thil kidang tamtah aso doh ho iheuvin ahi. Chujong leh hiche nikho chun mi sangthum jen in amaho abe taovin ahi. (Acts 2:37-42) Hallelujah
2. Mihem ten ilunggel ngaitona, ilungkham ilungdonna, ihahsat nao, inopsah nao ipi hijong leh Ama kom ilhut ji teng uleh lunggil tah in eingai peh jiuvin ahi;
- Emmaus kho jon seijui teni aPakai pao long, lhana aum tahlou jeh a lunggim tah a akihoulim nalhon chu phate cha angai peh na aki mun ahi. (Luke 24:13-16)
3. Amun leh aphat toh kitoh in thudoh naho amang chajin ahi
- Hiti chun Pakai Jesun aboi nalhon jouse, ajah jou chun alung thim lhona ahet nom lhon leh agaichat tun tun lhon Pathen gam thu chu ahi phat chun, Pakai Jesun thudoh anei tan chutoh lhon chun aman ‘ Mose apat le Themgao ho jousea pat in Pathen lekhabu a ama thudol jouse chu amani ahil chen tan ahi. (Luke 24:17-27)
Thuchai na:
Nang le keijong tunin Pathen lenggam kehlen nadin alhagao theng ichan masat u angai jin ahi, Ipakai Khonung
jui hi a mentee hon tahsantah a lunggel asei thei nao, chujong leh amun leh aphat kitoh a thudoh nale aboi
nahou kicheh tah lamhil ihi theiding hi apoimo lheh in ahi. YCPN Pathen in mapui jing hen lang, khang dong
tamtah tahsa leh lhagaova lampi phapen a puihoi jing thei din eimangcha jing taohen. Amen
“Lord Jesus make thyself to me a living bright Reality… More dearly, more intimately, nigh then even the sweetest earthly tie” (Hudson Taylor)
Kakipah e
Pastor. Nehhao Doungel
Missionary IEM
Robertsganj, Sonbhadra District, Uttar Pradesh
5th July 2020
